Turmush — Ош облусунун Алай районуна караштуу Памир-Алай айыл аймагында 5 социалдык объект пайдаланууга берилди. Бул тууралуу айыл өкмөт башчысы Кутманали Анарбаев билдирди.
Анын айтымында, Сары-Могол, Талды-Суу жана Сары-Таш айылдарындагы үй-бүлөлүк дарыгерлер топторунун имараттары долбоордун алкагында толугу менен капиталдык оңдоп-түзөөдөн өткөрүлдү.
«Мындан сырткары Сары-Могол айыл өкмөтүнүн мурдагы пайдаланылбай турган имаратына 3 сааттык бала бакча ачылды. Талды-Суу айылындагы спорт комплекси да пайдаланууга берилди. Республикалык бюджеттен 5 млн сом жана жергиликтүү бюджеттен 18 млн 800 миң сом бөлүнгөн. Бардык шарттары менен курулуп, спорттук шаймандар менен жабдылды», - деди Анарбаев.
Административдик-аймактык реформанын алкагында Сары-Таш, Сары-Могол жана Талды-Суу айыл аймактары бириктирилип, Памир-Алай айыл аймагы түзүлгөн. Айыл аймактын курамында 5 айыл бар. Калкынын саны — 11 481 адам.
