Turmush — Алай районунун Памир-Алай айыл аймагына караштуу Сары-Могол айылындагы үй-бүлөлүк дарыгерлер тобунун имараты оңдолуп жатат. Бул тууралуу аталган айыл өкмөттүн башчысы Кутманали Анарбаев билдирди.
Анын айтымында, капиталдык оңдоо иштерине 7 млн 430 миң сом бөлүндү.
«Үй-бүлөлүк дарыгерлер тобунун имараты 2004-жылы курулган. Фин тибинде курулгандыктан талапка жооп бербей келген. Кышкысын суук болуп, бейтаптарды кабыл алууда кыйналып келишкен. Быйылкы жылы CASA-1000 долбоорунун жергиликтүү коомчулукту өнүктүрүү долбооруна кирип, каражат бөлүнүп, оңдоо иштери жүрүп жатат.
Мындан сырткары Талды-Суу, Сары-Таш айылындагы үй-бүлөлүк дарыгерлер тобунун имараты да жаңыланат. Учурда долбоору даярдалууда», - деди айыл өкмөт башчысы.
Административдик-аймактык реформанын алкагында Сары-Таш, Сары-Могол жана Талды-Суу айыл аймактары бириктирилип, Памир-Алай айыл аймагы түзүлдү.