Turmush — Ош облусунда тамак-аш, азык-түлүк сатылган жайларга мониторинг жүргүзүлүп, текшерилет. Бул тууралуу президенттин Ош облусундагы өкүлчүлүгүнүн басма сөз кызматы билдирди.
Маалыматка караганда, президенттин Ош облусундагы ыйгарым укуктуу өкүлүнүн орун басары Эрнист Толтоев райондордун акимдери жана тиешелүү мамлекеттик органдардын жетекчилери менен облус аймагында санитардык-эпидемиологиялык кырдаалды туруктуу сактоо боюнча онлайн форматта жумушчу кеңешме өткөрдү.
«Облустун аймагында калктын санитардык-эпидемиологиялык бейпилдигин камсыз кылуу, санитардык-эпидемиологиялык кырдаалга жана анын өзгөрүшүн болжолдоого жараша ооруга чалдыгууларды алдын алуу, калкка гигиеналык тарбия берүү жана окутуу боюнча тиешелүү мамлекеттик органдардын аткарган иш-аракеттери боюнча маалыматтар угулду. Ошондой эле райондордогу санитардык-эпидемиологиялык кырдаалга көзөмөл жүргүзүү, санитардык-эпидемияга каршы (профилактикалык) иш-чараларды иштеп чыгуу жана аткаруу боюнча бир топ протоколдук тапшырмаларды берилди», - деп айтылат маалыматта.
Протоколдук тапшырмаларга ылайык, облустун аймагында 2 жумалык мөөнөттө тиешелүү мамлекеттик органдардын катышуусунда жарандарды тамак-аш, азык-түлүк жана башка тейлөө мекемелеринде мониторинг жүргүзүлүп, тейлөөчү мекемелердин ээлерине, кызматкерлерине усулдук иш-аракеттер жүргүзүлүп, практикалык жардам берилет. Ошону менен катар, райондук санитардык-эпидемиологиялык көзөмөлдөө кызматтары тарабынан семинарлар өткөрүлөт.
