Turmush — Ош облусунун Алай районунун борбордук аянтында миңге жакын эл чогулду. Алар өлкө башчысынан президенттик аппараттын жетекчисинин мурдагы орун басары Алмамбет Салиевди боштондукка чыгарып берүүнү суранышты.
Салиевдин тарапташтары ал боштондукка чыкпаса, Алайдын эли Бишкекке чейин жөө жүрүш жасашарын айтышты. Ошондой эле, алар «Алмамбетке боштондук!», «Сот адилеттүү болсун» деген ураандарды айтышып, Салиевдин 6-сентябрда боло турган сотунда адилеттүү чечим чыгуусун талап кылышты.
Алай районунун Кызыл-Коргон айылынын тургуну Шермамат Сарыков президент Садыр Жапаровго кайрылды.
«Урматтуу Кыргыз Республикасынын президенти Садыр Нуркожоевич, УКМКнын төрагасы Камчыбек Кыдыршаевич, сиздерге кайрылуубуздун себеби, биздин инибиз 3 айдан бери далилсиз айып менен камакта жатат. Ал бала же суракка чакыртылбай жаткан экен. Урматтуу Садыр Жапаров, сиз ушул ишти аягына чыгарып берсеңиз. Себеби сиз камактын, жалган-жалаанын, ата-эне, бир-туугандын кандай экенин билесиз. Ошол үчүн Алай элинин айткандарын угуп, тынчтык жолу менен балабызды эркиндикке чыгарып берүүңүздү суранабыз», - деди Сарыков.
Ал эми ардагер мугалим Айти Момукеев Алмамбет Салиев ак жерден камакта жатканын айтып, аны бошотууну суранды.
«Урматтуу президент, биздин балабыз ак жерден 3 айдан бери камакта жатат. «Ак ийилет, бирок, сынбайт» дейт кыргыз. Камчыбек досуңуз да жакшыны да, жаманды да башынан өткөрдү. Ошондуктан мындай себептер силерге тааныш. Мындан улам аны бошотууну суранабыз», - деди Момукеев.
Алай айыл өкмөтүнүн тургуну Каныкей Чомуева буларга токтолду.
«Жыландын баласы камакка түшпөсүн. Ошол жыландын баласына ыраа көрбөгөн камакка Алайдын баласы түшүп калды. Бул жаш бала, эми өсүп келе жаткан бала. Ошол укук коргоо органдары ак же кара дебей түрмөдө алып отургандыгынын себеби, баягы эле сасык саясатыңар. Садыр балам, эми өсүп келе жаткан баланын тамырына балта чаппай, бошотуп бер, суранам. Энелердин, ата-энесинин жүрөгүн аяп, чыгарып бер», - деди Чомуева.
16-июнь күнү УКМКнын басма сөз кызматы президенттин аппарат башчысынын мурунку орун басары Алмамбет Салиев кармалганын, ага мыйзамсыз баюу беренеси боюнча айып тагылганын билдирген болчу.